O folafolaga sili lava ua maua e tagata e mai le na foafoaina mea uma, ma le na Faaola mai, o le tulaga ua avea ai i tatou o tagata o le faamoemoe, tatou te faalagolago ai i folafolaga a le Atua e pei ona faailoa mai i ai tatou. Se i o tatou suesueina mafuaaga o le tulaga e faatuatuaina ai nei folafolaga.
O le soifuaga o Aperaamo ua atagia mai ai le faataunuuina e le Atua o ana folafolaga. Aua na folafola e le Atua ia Aperaamo o le a avea o ia ma tupuga o se nuu tele (Kenese 12:2,3) Na toe faailoa mai foi i ai e le Atua le mautinoaga o le fanau mai o sona suli. Peitai na manatu Aperaamo e faataunuuina lea folafolaga e ala i lana auauna o Elisara, peitai na faailoa atu e le Atua ia te ia, “Faauta foi, ua tulei mai le afioga a Ieova ia te ia, ua faapea mai, E le fai lea tagata mou suli; a o le e fanaua e oe lava e fai o ia mou suli.” Úa aumaia foi o ia i fafo, ma faapea atu, Ina vaavaai ae ia i le talgi, ma e faitauina fetu, pe afai e mafaia ona e faitauina; ua ia faapea atu foi ia te ia, E faapea lava lau fanau. Ua faatuatua foi o ia Ieova ona ia ta’uamiotonuina mai lea ia te ia.” (Kenese 17:6-8).
E tusa ma le 25 tausaga faatoa faataunuu ai lea ia Sara le mea na folafola atu ai e le Atua. (Kenese 21:1) Na folafola atu e le Atua ia Aperaamo le nuu o Kanana, e fai mona tofi, ina ua mavae le 400 tausaga o lo latou nofo pologa. “Ona fetalai mai lea o ia ia Aperaamo, Ia e iloa lelei e aumau lau fanau i le nuu ese, e nofo pologa foi i latou ia te i latou, e faatigaina foi i latou e i latou, o tausaga ia e fa selau;” O lenei folafolaga na faataunuuina. I le taimi o le Esoto, na faamauina ai e Mose le i ai o Isaraelu i Aikupito mo le 430 tausaga. (Esoto 12:40; Galuega 7:5-7).
Ina ua taunuu Isaraelu i le nuu o le folafolaga ona faapea mai lea o Iosua, “O lenei, e pei ona taunuu ia te outou o upu lelei uma na fetalai mai ai Ieova lo outou Atua ia te outou, e faapea foi ona faataunuu e Ieova …. (Iosua 23:15,16)
Peitai ona o le le usitai o Isaraelu o le ala lea o lo latou fetaia’i ma malaia o le feagaiga, ma o lea na toe tafea ai Iuta i Papelonia mo le 70 tausaga. Na ia auina atu i ai le tusi i Papelonia ma faapea atu, “Aua o loo faapea ona fetalai mai o Ieova, e faaatoatoaina tausaga e fitugafulu i Papelonia, ona ou asiasi ai lea ia te outou, ma ou faataunuuina la’u upu lelei ia te outou, i le faafoisia mai o outou i lenei mea. Aua ua ou iloa manatu ua ou manatu ai ia te outou, o manatu i le manuia. A e le o le malaia, o loo fetalai mai ai Ieova, e foaiina atu ia te outou le iuga e i ai le faamoemoe.” (Ieremia 29:10-11). Ina ua mavae le 70 tausaga, na tuuina mai ai lea o le poloaiga a Kuresa le tupu o Metai ma Peresia, ina ia toe fausia pa ma le aai o Ierusalema “ina ia faataunuu ai le afioga a Ieova mai le perofeta o Ieremia” (2 Nofoaiga a Tupu 36:22, 23.)
O le mautinoaga o folafolaga
O se tasi o folafolaga tulaga ese i le Tusi Paia, o le folafolaga lea i le afio mai o le Mesia. Na o mai soo o Ioane ia Iesu ma fesili mai, “Ona tali atu ai lea o Iesu, ua faapea atu ia te i laua, Ina o atu ia oulua, ma faailoa atu ia Ioane o mea na oulua faalogo i ai, ma vaai i ai; ua pupula tauaso ma ua savavali pipili, ua faamamaina lepela ma ua logo tutuli, ua faatutuina o e na oti ma ua folafolaina foi le tala lelei i e matitiva” (Mataio 11:3-5) Na faamatalaina ma le manino e Iesu le uiga o le galuega a Ioane i lona faapea mai, “Na afua mai i onapo o Ioane le papatiso, ua oo i nei ona po, ua taufaoa ai le malo o le lagi, o loo ua avea faamalosi foi e i latou o taufao. Aua ua vavalo mai le au perofeta uma ma le tulafono, ua oo lava ia Ioane.” (Mataio 11:12-13) O lea ua faailoa e Iesu o Ioane o le muamua e faalauleleia le ala o le Alii. Ona ia faapea atu lea, “Afai foi tou te loto ina talia, o Elia lava lea na tuu e sau.” (Mataio 11:14).
I le fetalaiga a Iesu, ua manino mai ai o Ioane le Papatiso, o ia lea na valoia mai e perofeta. O Iesu foi na valoia mai e perofeta--- O Iesu le Nasareta o le atalii ia o Iosefa (Ioane 1:45). O Iesu o le perofeta e pei ona valoia mai e Mose (Teuterenome 18:15.) Ina ua lauga atu Iesu i ta’ita’i o Iutaia na ia fetalai atu, “Aua foi ana outou talitonu ia Mose, po ua outou talitonu mai ia te au; aua ua tusia au e ia.” (Ioane 5:46) Ina ua mavae le toe tu mai o Iesu mai le tuugamau, na ia toe faailoa atu ai i ona soo, “Ua fetalai atu o ia ia te i latou, O upu ia na ou fai atu ai ia te outou, ina o ou ia te outou; e tatau ona taunuu o mea uma ua tusia ia te au i le tulafono.” (Luka 24:44) O le faamaoniga lea o le moni o le mautinoaga i folafolaga a le Atua.
Faamoemoe ma folafolaga
O le soifua ma le galuega a Keriso i le lalolagi ua faaulufale mai ai le malo o le alofa tunoa o le Atua. Ua le o toe mamao ona aumaia lea e Keriso o le malo o le mamalu. I lana tatalo i le Ioane e 17, “O le ola e faavavau foi lenei” (Ioane 17:3) ma ua tatou i ai i le taimi o le malo o le Atua.
Ua uma foi ona ia folafola mai i ona soo faapea i tatou, “Ou te toe sau, ou te talia foi outou ina ia i ai outou i le mea ou te i ai a’u.” (Ioane 14:3) Ua avea ai lenei feau o le feau o le faamoemoe mo e talitonu ma talia o ia. “E moni, e moni, ou te fai atu ia te outou, o le faalogo mai i la’u upu ma talitonu ia te ia na auina mai a’u, ua ia te ia le ola e faavavau; e le oo foi ina faasalaina o ia, a ua oo atu ia i le ola, sa i le oti. E moni, e moni, ou te fai atu ia te outou, e oo i le aso, ua oo nei foi i ai, e faalogo mai ai e ua oti i le leo o le Atalii o le Atua, o e faalogo ai foi, e ola ai i latou.” (Ioane 5:24-25)
O le toe tutu na valoia mai foi: “E toatele foi o e momoe i le efuefu o le eleele latou te ala mai, o isi i le ola e faavavau, a o isi i le faalumaina ma le inosia e faavavau.” (Tanielu 12:2) Ua faapea foi ona valoia mai e le perofeta o Isaia lea lava tulaga e faapea, “E toe ola mai ou tagata oti, o latou tino oti e toe tutu mai….” (Isaia 26:19)
O oe ma a’u o loo faatalitali atu i le faamoemoega e manuia ai—“O le faaali mai lea o le mamalu o le Atua ma le Faaola o Iesu Keriso” (Tito 2:13) Ua i ai tatou lea mautinoaga e faalagolago ai i ana folafolaga. Aua na tausisia lava e le Atua ana folafolaga i taimi ua mavae, e mautinoa foi lona tausisia o ana folafolaga i le taimi nei ma le lumanai. Amene
