E mo le toatele o tagata, o le sailiga o le fiafia o se mea lea ua latou faia i le olaga atoa. O nisi ua na o se vaega o taimi o o latou olaga e maua ai le fiafia. A e o le tulaga mautinoa, o le fiafia loloto, tuutuu loloa, e le maua lea i ni mea ua maua, o se siosiomiaga o ni mea tutupu, atoa foi ma ni tagata e mafuta i ai. Ua mafua ona faapea, ona o mea e mafai ona tuai ma mavae, e fesuisuia’i foi siosiomiaga o mea tutupu, ma e mafai foi ona faa’ole’ole tagata ma ola tau faalata, e oo lava i le tiaina ma tuua i tatou.
O tagata Fiafia
Ona o i tatou o tagata ua i ai le faamoemoe, o lo tatou olioli la e faavae i luga o se tasi e sili atu i lo i tatou. O ia lea, “e le liu o ananafi, o le aso, e oo lava i le faavavau” (Eperu 13:8). Ua manino ona faailoa mai e le Tusi Paia, o le fiafia e le maua mai lea i lo tatou vaai ifo i o tatou lava manaoga, a e o le vaai atu ma tali i manaoga o isi tagata. E pei ona faailoa mai e le aposetolo “Ia tumau le fealofani o le au uso….Aua le galo le alofa i tagata ese….Ia manatua e ua noanoatia….ia manatua foi e ua agaleagaina….Ia lelei le faiava i tagata uma….Ia aunoa a outou amio ma le matapeapea; ia gata ia o outou manao i mea ua ia te outou… Ou te le tuua lava oe, ou te le tuulafaoai lava ia te oe” (Eperu 13:1-5)
O loo tumu le Tusi Paia, i folafolaga e faamanatu mai ai le taua o le faatuatua i le Atua ma talia lana fuafuaga mo le maua o le fiafia e tumau. “Amuia le tagata o ia le Atua o Iakopo e fai mona fesoasoani; o i ai lona faamoemoe ia Ieova lona Atua….E faatutusa’oina e Ieova i e faano’uno’u; e alofa Ieova i e amiotonu.” (Salamo 146:5-8)
Ae faapefea la pe a fetaia’i ma tulaga e oo mai ai le le fiafia, atoa ai ma lagona o le leai o se faamoemoe? Ua faailoa mai e Iopu le tali pe a aafia le tagata i tulaga e le fiafia ai. “Faauta mai, amuia le tagata ua aoaiina e le Atua; o le mea lea aua e te ta’ufaatauvaaina ai aoaiga a Le ona le malosi uma lava. Aua o ia na te faatigaina, o ia foi na te fusia, o ia e manua ai, o ona aao foi e fofo ai.” (Iopu 5:17-18).
O le fiafia moni e sili atu nai lo fiafiaga ma le faamalieina o tu’inanauga. Aua o se lagona loloto tuutuu loloa, e mafua mai i le iloa lelei o lo tatou taunuuga e faavavau ona o le Atua o ia e sili atu i lo i tatou. E ao ona tatou faalagolago ia Iesu, “ma ia vaavaai atu ia Iesu o le na te ta’ita’iina ma le na te faaatoatoaina le faatuatua, o le na onosai i le satauro, na faatauvaaia te i le ma, ona o le olioli sa tuu i ona luma, ua nofo foi o ia i le itu taumatau o le nofoalii o le Atua.” (Eperu 12:2)
O tagata ua i ai le Filemu
E pei foi le filemu o le fiafia, ua auga tupulaga o sailia pea e tagata, peitai o nei sailiga e tele ina le faamanuiaina. I ni suesuega na faia ua ripotia ua mafai ona tusitusia le tusa ai ma le 3,530 tausaga o le tala faasolopito, e na o le 286 tausaga mai nei tausaga e tele o loo faamauina na maua ai se filemu. E le gata i lea e 8,000 maliega na faia mo se filemu, ae na le faamautuina. O nei vaaiga o le leai o se filemu i le lalolagi, ua faapena ona aafia ai foi ma aiga i atunuu uma. O le ala lea o le maualuga o fuainumera o aiga malepelepe, o ulugalii tetea, o sauaga, o le mativa, o le soli tulafono, o le pule i le ola, ma e oo mai ai se lagona e i ai ea se filemu.
E tusa ai ma le faauigaina e se tasi lolomi fefiloi o le upu filemu, o loo faapea mai ai o le saoloto lea mai le vevesi, atoa ai ma uiga toamalie. O le filemu toamalie, lea na manaomia e le au soo i le taimi na tulai mai ai le afa, ma na vavao ai e lesu le matagi ma faapea atu “Faalologo ia”. (Mareko 4:39)
E aumaia e Iesu le Filemu
O Iesu o ia lea na te aumaia le filemu i ai tatou. O ia o le “Alii o le Filemu (Isaia 9:6) Peitai e pei lava tagata na soifua i taimi o Iesu o i tatou, e sese lo tatou faauigaina o le upu filemu. E mo tausaga e tele na manatu ai lava tagata Iutaia o le a aumaia e le Mesia le tamaoaiga, le mamalu i lo latou malo e pei ona sa i ai i le taimi o le tupu o Tavita ma Solomona.
I le taimi foi o le fausia o le malumalu lona lua, e ui na iloa e Isaraelu e le tutusa lea ma le malumalu muamua na fausia e Solomona, peitai na latou taofi o le malumalu lea e maua ai e i latou le filemu (Hakai 2:9). Ae ina ua afio mai Iesu latou te le’i talia, ona e le o le feau lea sa latou fia faalogo i ai. Na latou manatu o Iesu e faatoilaloina o latou fili. A o lea o loo ua faapea mai Iesu, “Ia alofa atu i le ua ita mai ma fai oe ma ona fili….” (Mataio 5:44) E le gata i lea ua a’oa’o mai foi Iesu, “O le fia sili ia avea ma auauna….” (Marko 9:35)
O le olaga fanaufouina
I le taofi o tagata ia faaputu le tamaoaiga a e ua faapea mai Iesu, “Ia outou faatau atu i a outou mea, tou te avatu ai e fai ma mea alofa.” (Luka 12:33)
Na silafia lelei lava e Iesu o loo ofoina mai e le lalolagi le filemu faa’ole’ole, o le faamoemoe faafoliga, e faavae i luga o le manatu faapito, i luga o mea ua maua, ma le siosiomaga o mea tutupu. Na ia silafia e folafola mai e le lalolagi le filemu, a e oo mai le fano faafuasei (1 Tesalonia 5:3)
O le filemu o loo ofoina mai e Keriso e le faapea o le a leai ni faafitauli poo ni faigata e tutupu mai. A e ua ia folafola mai lona faatasi mai i taimi o faafitauli ma faigata. “Ou te tuuina atu ia te outou le manumalo (filemu); o lo’u manuia (filemu) ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.” O le agaga o lenei fetalaiga e faatasi ma lotolotoi le Atua i taimi o faafitauli o ona tagata. O le filemu lena, e maua e le tagata faatuatua.
O le upu filemu e faaaoga soo e lesu. Na ia vavao ma faafilemu afa, na ia faatoamalie tagata mama’i, na ia faamagalo ma aveese le lagona nofosala o le tagata agasala, na ia tutuli temoni ma ia folafola atu i tagata ina ia latou maua le filemu.
O Tagata o loo Vivii i le Atua
Sa i ai se tagata na pipili mo le 40 tausaga. O lana masani o le nofo i luma o le malumalu. Ina ua o atu Peteru ma Ioane e tatalo i le malumalu, na iloa mai e le pipili ma ‘aisi mai mo se tupe. Peitai na ia maua le mea e sili atu i lo le mea na ia ole mai ai (Efeso 3:20)
Ona tago lea o Peteru i lona lima ma faatu o ia i luga ma faapea atu, “I le suafa o Iesu Keriso le Nasareta, tulai ia ma savali (Galuega 3:6) “Ona faamalosia loa lea o ona vae ma ponaponavae. Ua oso ia i luga ma tu, ua savali foi, ua ulu faatasi foi ma i laua i le malumalu, o loo savali ia, ma oso, ma vivii atu i le Atua.” (Galuega 3:7-8)
E faapena i tatou, e le mafai ona tatou savavali na o i tatou, a e tatou te manaomia le mana faamalolo o Iesu i o tatou olaga. O tagata o le faamoemoe e tatau ona iloa i o latou foliga o ni tagata fiafia, atoa ai ma le filemu, ona o le mautinoaga o lo tatou ola ma lo tatou lumanai o loo i aao o le Atua. O le fiafia ma le filemu o mamanu ia o le faamoemoe o i totonu o o tatou loto. Ua o le ala lea e tatau ai ona vaaia le fiafia ma le filemu i o tatou olaga. E le gata i lea o loo vivii atu i le Atua o le ua faia mea tetele mo i tatou (Salamo 126:3) Amene
